✡ सावाःचपाः/ सामा सतःया ऐतिहासिकता ✡

 ✡   सावाःचपाः/ सामा सतःया ऐतिहासिकता    ✡

      येँ देयेया उत्तर दिशाय् लागू थौकनय् झिसं सामाखुसी धायेगु याना वयाच्वनागु थायेया कपुर धारा चोकय् हे आ याङिखेम फर्मानांया वासःपसः तयातगु निताजागु (पसःकवनापंयाना स्वता) छें न्हापा सतः जुया च्वंगु जुया च्वन । अले व सतःयानां सावाःचपाः खःसानं लिपा लिपा सामा सतः धायेगु यानतगु जुया च्वन खनि । वहे सतःया जवपाखे छेँ क्वय् बँय् महामञ्जुश्री पाली दु । थ्व सतःया नां सामा छाय् गथे जुल खः अलय् अन मञ्जुश्रीया पाली गथेदुगुखः धईगुखँय् अन जखः छेँ दुम्ह तर ध्वाखाबाःया मूबासिन्दा बुद्धराम  महर्जन दाजु नापं थौ सामा( साम्हाः) अजिमाया बारे  घौच्छिति खँ ल्हाना बलय्  वयेकनं सिउगु खँ थुकथं कनादिल ।

      सामा वाय् साम्हाः अजिमाया नां आतकं ङ्यनेमननी तर सतः व अनया खुसीया नां सामा सतः व सामाखुसी छाय् वाय् गथे जुल धईकथं विस्तारी कनादिल । 

      प्राचीन नेपालमण्डलय् च्वगु कालीदहया लः पिनय् च्छ्वयत महामञ्जुश्रीं थःगु चन्द्रह्रास खड्गं थिथि थासेया डाडाय्या नापं क्वयनाय् न्हसिकाप् पाला लः पिहाँ वनेगु लँ दयके धुङ्का । थन स्वनिगलय् वस्ति दयेके लायकयाना न्हापागु नगर मञ्जुपतन नगर पलिस्थायाना यागुजुल । थन मनुतत बसोवास याके धुङ्का  मनुतयत बुँज्याःयाय्गु थाय् दयेकेगु कथं आया सामाखुसी लागाय् भच्चा गाःजुया मुना च्वंगु लँ पित च्छ्वयत थःपिनि निम्ह शक्तिस्वरुपा मिसापिं मध्य छम्ह शक्तिस्वरुपा मिसा व मञ्जुश्री  निम्ह थुसा ज्वना अन सावाःवाना( गोरु जोतेयाना) लः वनेगु लँ दयेकगु जुया च्वन । मञ्जुश्रीं सावाःना लँ पिने वनेगु लँ दयकगु खुसीइत हे सावाःखुसी धायेगु यानातगु । सावाःयायेगु ज्याःक्वमचातले मञ्जुश्री अन छगु चपाः( बल्चा/फल्चा) दयका अनहे बाय् च्वनिगु जुया च्वन ।

       मञ्जुश्रीया निम्ह शक्तिस्वरुपा मिसापि मध्य छम्ह स्वयभूइ वाय् गनखः मञ्जुश्री च्वनीथाय् हे च्वना च्वन तर मञ्जुश्री व मेम्हशक्ति मिसान तन्हुतक लिहाँ मवगुलि निम्ह गनवना च्वन धया ध्यानदृष्टि स्वया लुइका । अहो थुपिं निम्हला जित त्वता मोजमजा यानाच्वनका धईकथं भचा मनयवंका तँवया च्वन  । मनय् दाहायाना मञ्जुश्री सावाःयेगु ज्याः त्वता थुसा अनहे त्वता मञ्जुश्री व मिसा उखे थुखय् गनं वना च्वंबलेलाक अन वना छम्ह थुसा नक्साल आ थौ कने साकुना माजु(निल सरस्वती) दुथाय् येङ्का थुसा कुना बिउगु जुया च्वनखनी । अथेजुया अन बिज्याना च्वम्ह महाबिद्या ताराइत साकुना माजु धायेगु यानातगु धया खँ बुद्धराम दाजुं  कनादिल । मञ्जुश्रीं सावाःयत बाय् च्वंगु चपाः( बल्चा/ सतः जुया व थाययात सावाचपाः धायेगु यागु खः । लिपा जुजुं सामा सतः धायेगु यागु खनेदु । अथे जुया व सामा सतःया न्ह्यनय् मञ्जुश्रीया पाली चिं दुगु खने दुगु जुया च्वन ।  

       निम्ह थुसा मध्य छम्ह थुसा आन अन थुसाख्यलय् हे खनेदु ।  न्हापा न्हापा दिपंर चाहुवइबलय्  थ्व थुसा न कायेगु यागु स्यूपिं यक्व ज्याथःजिथित न दु ।

      न्हापा सामा सतः लिउनय् छगु बिहार न दुगु खँ नेपाः देया बिहारया ताःचा प्रज्ञापूरी महानगर नांया छगु सफुति च्वयातगु  खँ न कनादिल । व सफुलय् च्वयात कथं सामा सतः लिउनयया बिहारया नां श्री मीत्र महाबिहार( सामाखुसि बिहार) धया च्वयातगु न खँ कनादिल । अन आ स्वय्बले बिहार दु धईगु छुं चिंतक न खने मदु ।

    बुद्धराम दाजुं धयादि कथं सामा सतःनापं छें दुम्ह छम्हेसिन थ्व ऐतिहासिक सतः थःगु छेंया कित्ता दुनयहे लाका कथु मथाक नयेत्यङ्गु अवस्थाय् स्थानिय सम्पदा प्रेमि मनुतयसं कानूनी प्रकृया कथं मुद्दा ल्वाना त्याका सतः कायम यागु जुयाच्वन ।  न्हापा थ्व सतःलय छगु शिलापत्र न दुगु खः तर सतः नयतस्वम्हस्या शिलापत्र म्हासेयागु जुया आ छुं शिलापत्र खनेमदुगु । वासः पसःतयातगु सामा सतः आ स्थानिय छगु क्लबया जिम्मा दुगु खँ दु ।

       सावाचपाः / सावाःसत / सामा सतः या न्ह्यनय हे दुगु मञ्जश्रीया पालीचिं सडक विस्तारयाबले लँ सिथय बँय् चिका तगु दु । जलाहार उत्तर दिशा स्वकि माथाय् पूर्वय स्वकातगु खनेदुु । 

       प्राचीन नेपाः निर्माण नापं स्वापुदुगु अले मञ्जुीश्री बाय् च्वङ्गु चिं कथया सतः व मञ्जुश्रीया पाली नेपाः देया ऐतिहासिक सम्पदा खयान गुलि संरक्षण यायमागु खः आतकं सुनान संरक्षण यागु खने मदु । शिवलिङ्ग खनेमदुगु जलाहारय् मञ्जुश्रीया पाली चिै छाय् च्वन अथेहे अन दुगु पिखालखु थजागु स्वङ्गु मण्डया थथेहे खः धया धाययेत सस्यूपिंसं दुवाला स्वयमागु न खनेदु ।

#प्रकाशमानशिल्पकार

ध्वाखाबाःलय् च्वंम्ह बुद्धराम दाजु नापं छपा सेल्फि